26 de febrero de 2018

Aniversario de Rosalía de Castro 2018


Tal e como informamos hai uns días, o pasado sábado 24 de febreiro do 2018, a Asociación de Veciños Raigame celebrou, na céntrica Praza de Vigo, un íntimo acto no que se conmemoraría o nacemento de Rosalía de Castro neste recuncho da cidade e se rendiría unha pequena pero sentida homenaxe a esta nosa ilustre e luminosa musa das letras. Deseguido achéganse o texto íntegro da Asociación de Veciños Raigame e unha pequena mostra fotográfica do acto:

"Din que os ingleses conservan a casa natal de Shakespeare pero aquí estas cousas non se levan. Nin sequera Cervantes tivo esa honra, xa que tivo que conformarse cunha copia. Cando aos nosos governantes lles deron a escoller entre cultura e coches, sempre escolleron a cultura do coche, e se non que lle lo pregunten ao edificio Castromil!!  

Menos mal que aínda temos Catedral e Obradoiro. Ben seguro que a alguén se lle pasou pola cabeza un parking debaixo delas!!!

Hoxe estamos aquí para dar luz sobre un tesouro do noso Ensanche e que tamén forma parte das nosas Raigames. 

Tal día como hoxe, hai 181 anos, aquí naceu Rosalía de Castro -nai da literatura galega- na Casa da Parra do Agro das Barreiras, no recén nacido Concello de Conxo.

Estas son as nosas Raigames, as que debemos cultivar e regar diariamente. Porque xa se sabe o que sucede cando a unha árbore lle cortan as súas Raigames.

Parabéns a toda a cidadanía do Ensanche neste fermoso día de febreiro"



Asociación de Veciños Raigame

Febreiro, 2018





23 de febrero de 2018

As Raigames do Ensanche

De seguro que o noso barrio do Ensanche non acadaría premio algún de arquitectura e, posiblemente, tampouco de urbanismo. Un arrabalde trazado e feito "a cordel" como diría un coñecido arquitecto picheleiro.

Probablemente foi a mestura explosiva de improvisación e especulación o que deu forma a este barrio no que agora vivimos e traballamos milleiros de persoas. Coma se dun ser vivo se tratara, cos seus anos ao lombo, cos seus achaques e doenzas, tentamos facerlle algunha operación de cirurxía, facerlle algún que outro transplante de tellas e algunha operación de cadeira, xa que moitos non podemos subir escaleiras.

Para milleiros de habitantes a nosa vida está aquí e aquí queremos que siga, polo tanto teremos que facer o que faga falla para que o barrio do Ensanche sexa o Santiago moderno que, xunto coa Compostela histórica, sume unha gran cidade dinámica e chea de vida. Para elo nada mellor que afondar nas nosas Raigames para coller pulo e encarar o futuro. 

Porque, aínda que non o pareza, o Ensanche ten unhas fermosas Raigames que nunca se puxeron en valor. Unha delas é o lugar de nacemento da nosa Nai da literatura galega, aquela que –desde as beiras do Sar- lle cantou ao Cruceiro de Ramírez. Si, estamos a falar de Rosalía de Castro, que naceu un 24 de  febreiro de 1837 nunha casa da Praza de Vigo, daquela era o concello de Conxo,  como así tamén era a maioría da parte baixa do Ensanche. 

Mañá sábado celebramos o aniversario do seu nacemento, e de nós depende que lle demos luz a este gran tesouro que temos no noso barrio.



Asociación de Veciños Raigame

Febreiro, 2018




Máis información:

O acto conmemorativo do Aniversario de Rosalía de Castro celebrarase mañá día 24 de febreiro ás 18:00h na Praza de Vigo. Asistirán, entre outros, Anxo Angueira da Fundación Rosalía de Castro, a Tenente Alcalde María Rozas e o noso Presidente, Xaquín Mato.

16 de febrero de 2018

Programación do CIAC para o mes de marzo


O Centro de Interpretación Ambiental de Compostela (CIAC) quere darlle a benvida á primavera facendo unha homenaxe ás nosas árbores, a eses seres vivos silenciosos que ademais de froitos, cores e recendos, bríndannos o osíxeno que precisamos para vivir. A programación que vén de presentar o CIAC para este marzal destaca pola celebración do "Día da Árbore" cun obradoiro sobre recoñecemento das árbores para os máis pequenos, seguido dun interesante roteiro interpretativo baixo o lema “Coñecendo as árbores do Parque de Belvís":


Sábado 24 de marzo  |  Celebración do Día da Árbore


      • Ás 11:30h | Obradoiro de Recoñecemento de Árbores: 

Con este obradoiro o CIAC quere transmitir aos pequenos e pequenas da casa a importancia que teñen as árbores para o planeta, en xeral, e para os seres humanos, en particular, e iniciar o seu coñecemento e recoñecemento das diferentes árbores que podemos encontrar en Compostela, concretamente no parque de Belvís. Esta dirixido a nenos e nenas a partires de 6 anos.

Esta actividade é de balde pero é preciso inscribirse. Podelo facer por calquera dos seguinte medios:

      • Ás 16:30h | Roteiro "Coñecendo as árbores do Parque de Belvís":

Os parques das cidades son sen dúbida un aspecto importantísimo para o medio ambiente e a calidade de vida da comunidade, onde se esconden unha grande biodiversidade, na que encontramos  diferentes especies de árbores.  Con este roteiro o CIAC pretende dar a coñecer máis profundamente as diferentes árbores que nos rodean e que vemos todos os días no Parque de Belvís, para saber diferencialas e ser conscientes da súa importancia. Está dirixido a todos os públicos (rapaces e rapazas a partires de 9 anos).

Esta actividade é de balde pero é preciso inscribirse. Podelo facer por calquera dos seguintes medios:



28 de septiembre de 2017

O Alcalde presenta o cartel da terceira edición dos "Máis de 55 anos vivindo o Ensanche"

Presentación da programación das Festas do Ensanche no Pazo de Raxoi.
Foto: santiagodecompostela.gal 

O Alcalde de Santiago, Martiño Noriega, acompañado do noso Presidente de Raigame, Xaquín Mato; do Secretario de Santiago Centro, Delmiro Prieto e da Presidenta de Em-Rede, Eva López; vén de facer pública a programación da terceira edición das nosas festas; os “Máis de 55 anos vivindo o Ensanche”. No acto de presentación, que tería lugar onte día 26 de setembro no Pazo de Raxoi, o Alcalde amosaría a súa satisfacción pola consolidación da festa e remarcaría a importancia do traballo colectivo. Segundo Noriega, "un barrio organizado e os seus representantes traballando da man do Concello é unha garantía de éxito".

De esquerda a dereita; Xaquín Mato, Eva López, Delmiro Prieto e o Alcalde de Santiago, Martiño Noriega. 
Foto: santiagodecompostela.gal 

A Presidenta de Em-Rede, Eva López, en referencia á celebración da III Festa do Comercio, destacou que este ano "foi preciso ampliar o número de postos previsto”, confirmándose un total de 40 establecementos. Aqueles adicados ó textil, ós complementos ou á zapatería, exhibirán unha pequena mostra dos seus produtos no desfile “Moda a pé de rúa”, que se celebrará o venres 29 ás 19:00 h na Praza Roxa. 

Pola súa parte, Delmiro Prieto, anunciaría tamén a celebración dunha Marcha Ciclista que sairá o domingo día 1 de outubro da Praza Roxa e que promote consolidarse na programación das nosas festas. Segundo o Secretario de Santiago Centro, o tecido asociativo do Ensanche "quere ser partícipe do compromiso con outro modelo de mobilidade” e que esta nova actividade "sirva para concienciar aos condutores, pero tamén aos ciclistas, de cales deben ser as súas prácticas nas rúas para conseguir unha circulación máis segura".


Dende Raigame desexamos que todo este esforzo colectivo, tal e como tivo a ben sinalar o Alcalde, remate por ser“unha garantía de éxito”. Por terceiro ano consecutivo, desexámosvos a tod@s unhas boas Festas do Ensanche!



Máis información:

18 de septiembre de 2017

Todo listo para as Festas do Ensanche 2017


Outro ano máis, os veciños do Ensanche compostelán teremos o enorme pracer de volver a conmemorar os máis de 55 anos de vida do noso barrio. E celebrarémolo como os dous anos anteriores; por todo o alto!  Temos todo listo para gozar dunha gran festa ateigada de actividades para os máis grandes e pequenos da casa.

O sábado 30, pecharemos setembro celebrando o día grande deste 57 aniversario do Ensanche. A música correrá a cargo de Kind of Soul, Mojo Experience, Jorge Casal, a Charanga Mekánika e pasarrúas de música tradicional. Tamén haberá exhibicións de baile, de deportes e un sen fin de xogos populares. E por se fose pouco, este ano tamén se celebrará o "I Torneo de Xadrez do Ensanche":


Ca fin de que o noso comercio teña tamén o seu oco neste 57 aniversario, ó longo das rúas do noso barrio celebrarase a "III Feira do Comercio", na que numerosos establecementos locais expoñerán os seus produtos e ofrecerán promocións especiais. Tamén haberá sorteos, desfiles de moda, exposicións de téxtil, de artesanía, e variados postos de alimentación.

Así que xa sabedes, os vindeiros días 29, 30 de setembro e 1 de outubro, estades todos convidados á gran festa do noso barrio; “Máis de 55 anos vivindo o Ensanche”.


Máis información:

2 de mayo de 2017

Programación do CIAC para o mes de maio



O Centro de Interpretación Ambiental de Compostela (CIAC) vén de presentar unha interesante programación de actividades para este mes de maio, entre as que cabe destacar o xa tradicional roteiro, desta volta polas Brañas do Sar, amais dunha exposición temporal sobre “A Contaminación Luminosa” e unha xornada de divulgación sobre esta problemática ambiental. 

A continuación achégase máis información referente a estas actividades:


Exposición Temporal: “A Contaminación Luminosa” | Do 10 de maio ó 3 de xuño 

Trátase dunha interesante exposición que nos achega á complexidade desta problemática ambiental, á súa orixe e algunhas das súas consecuencias, así como ás solucións que se debería adoptar. Poderemos desfrutar desta didáctica exposición desde o mércores 10 de maio ata o sábado 3 de xuño en horario de apertura ao publico. +info: 981 543 145


Xornada de Divulgación sobre a problemática da Contaminación Luminosa | Sábado 13 de maio 

Toda unha xornada a abordar esta problemática desde diferentes perspectivas:

      • Ás 12:00h | Obradoiro de “Pequen@s Astrónom@s: 

Sinxelas ferramentas para descubrir o ceo nocturno”, para nenas e nenos, a partir de 7 anos, acompañados dunha persoa adulta. Achegarémonos ás dificultades para coñecer o ceo estrelado desde a cidade. Aprenderemos o que podemos atopar nun ceo nocturno escuro coa axuda dun simulador e construiremos algunhas sinxelas ferramentas para ir familiarizándonos coas formas que fan as estrelas no ceo. 

      • Ás 18:30h | Charla Coloquio sobre Contaminación Luminosa:

Abordarase a orixe do problema, as consecuencias económicas, medio ambientais e para a saúde humana, así como as solucións que se deberían tomar. Para isto contarase coa participación de expertos que nos achegarán a esta problemática desde diferentes perspectivas: Salvador Bará (USC), Óscar Sánchez (Agrupación Astronómica Coruñesa Ío) e Lucía Giráldez (Calidade do Ceo Nocturno).

As dúas actividades son de balde pero para o obradoiro as prazas son limitadas, polo que é preciso inscribirse.

Inscrición:

• Teléfono: 981 543 145

• Inscrición no obradoiro “Pequen@s Astrónom@s...”:  https://goo.gl/m4PEfY 


Roteiro Interpretativo polas Brañas do Sar | Sábado 27 de maio ás 12.00 h.

Como cada derradeiro sábado de mes, faremos un roteiro. Esta vez será polas Brañas do Sar, onde poderemos descubrir os seus valores naturais, os seus usos tradicionais e outras curiosidades deste fermoso entorno. A actividade está dirixida a todos os públicos (nenos/as a partir de 7 anos). É de balde pero é preciso inscribirse.

Inscrición:

• Teléfono: 981 543 145



6 de febrero de 2017

Programación do CIAC para o mes de febreiro



O Centro de Interpretación Ambiental de Compostela (CIAC) vén de presentar unha interesante programación de actividades para este mes de febreiro, entre as que cabe destacar un obradoiro de compostaxe doméstica e un roteiro polo Parque de Belvís. 

A continuación achégase máis información referente a ámbalas dúas actividades, que son de balde pero requiren inscrición previa:


Obradoiro de Compostaxe | Sábado 18 de febreiro do 2017 ás 12.00 h.

Se che apetece coñecer unha alternativa ecolóxica para o tratamento dos residuos orgánicos da casa, os restos das podas, horta e xardíns, que posibilita a súa reciclaxe, transformando estes residuos nun abono de excelentes cualidades podes anotarte a este obradoiro. A actividade está dirixida a todos os públicos. 

Inscrición:

• Teléfono: 981 543 145




Roteiro polo Parque Belvís | Sábado 25 de febreiro ás 12.00 h.

Os nosos parques son moito máis que espazos verdes, neles desenvólvense moitas actividades que enriquecen non só a biodiversidade da nosa cidade se non a oferta de actividades, o noso ocio, a nosa forma de relacionarnos. Ofrecemos unha camiñata polo Parque de Belvís para coñecer todas as funcións coas que nos agasalla. A actividade está dirixida a todos os públicos.

Inscrición:

• Teléfono: 981 543 145