23 de diciembre de 2014

Solidariedade coa Plataforma Víctimas Alvia 04155

Dende a Asociación Veciñal Raigame queremos mostrar o noso apoio e solidariedade á Plataforma Víctimas Alvia 04155, que representa ás vítimas e familiares do accidente ferroviario ocorrido o pasado 24 de xullo de 2013 nas inmediacións da parroquia compostelá de Angrois, e que están a recadar fondos para a produción dun documental totalmente independente que conte a verdade e a realidade desta traxedia. 

Esta plataforma, que xa vén de denunciar en reiteradas ocasións, pública e xudicialmente, e ante o mesmo Parlamento Europeo o pasado día 12 do presente mes de decembro, o incumprimento da normativa de seguridade ferroviaria e publicidade enganosa, co apoio de diferentes grupos políticos como o BNG, IU e UPyD, continúa loitando por que se faga xustiza e para evitar que esta traxedia volva a suceder no futuro.

Para levar a cabo este proxecto están a solicitar, a través da plataforma de Crowdfunding, fondos, apoio e difusión. Toda a información relativa a esta campaña está dispoñible nas seguintes ligazóns: 



Dende a Asociación Veciñal Raigame queremos contribuír a difundir este proxecto e desexar que o mesmo poida chegar a ser toda unha realidade que contribúa a facer xustiza e a sacar á luz a verdade dunha traxedia que nunca debeu suceder. 

26 de noviembre de 2014

Comeza a Feira de Outono da Rúa Ramón Cabanillas



Hoxe, mércores día 26 de novembro de 2014, comeza a Feira do Outono na Rúa Ramón Cabanillas de Santiago de Compostela. A feira, promovida polos comercios da devandita rúa compostelá, contará con numerosas actividades a pé de rúa, tal que obradoiros para cativos, desfiles de moda, orquestra, pasarrúas, e todo tipo de descontos especiais e agasallos nos diferentes comercios da zona. Achegamos de seguido as diferentes actividades que tamén se celebrarán no CSC O Ensanche (Rua Frei Rosendo Salvado 14-16): 

Mércores 26 de novembro ás 20.00h: Charla eco-saudable. Interpretacións erróneas da medicina polo Doutor Carlos Torres Fortich. Organiza APEGA e A cesta da saúde.

Xoves 27 novembro ás 20.00h: Charla eco-saudable. As oportunidades do outono pola psicóloga Carmen Morell. Organiza APEGA e A cesta da saúde.

Venres 28 novembro ás 18.30h: Curso-degustación de cociña con alimentos de outono pola cociñeira Gloria Domeneq. Inscricións no 607947795 Organiza APEGA e A cesta da saúde.

Sábado 29 de novembro dende ás 11.00h: Microcharlas eco-saudables. Organiza APEGA e A cesta da saúde.

25 de noviembre de 2014

Veciños e responsables municipais analizan os problemas da cidade


Foto: Sandra Alonso, La Voz de Galicia

O noso presidente Xaquín Mato vén de participar xunto con outros representantes veciñais, políticos e técnicos locais, nun foro promovido por La Voz de Santiago e Radio Voz, e celebrado no CSC Aurelio Aguirre de Conxo, co obxectivo de analizar e debater encol dos diferentes problemas, as carencias e as principais necesidades que afectan a boa parte da cidadanía compostelá. Tamén foron achegadas numerosas suxestións, tanto dende a Asociación Veciñal Reigame, por medio do noso presidente, Xaquín Mato, como tamén das compañeiras e compañeiros de San Pedro (A.Vv. A Xuntanza); Sar (A.Vv. Sar); Pelamios-Vista Alegre (A.Vv. As Brañas de Andrés) ou Cesar (A.Vv. Cesar). 



Froito dese foro celebrado no Centro Sociocultural Aurelio Aguirre de Conxo, este pasado domingo día 23, a edición impresa do xornal La Voz de Galicia abriría a súa portada local cunha fotografía dos participantes no foro e cun contundente titular: “Los vecinos quieren un Santiago más humanizado y equilibrio inversor”. Nas páxinas interiores, concretamente na L2 e na L3, o xornal facíase eco dalgunhas das declaracións dos participantes. O edil de Seguridade cidadá, Alejandro Sánchez-Brunete, recoñecía que dende o comezo da crise minguaron os medios da Policía Local, mentres que Teresa Barral, Vicepresidenta da A.Vv. As Brañas de Andrés, e o noso presidente, Xaquín Mato, denunciaron a necesidade que viven as familias e os barrios. No que respecta á mobilidade, os representantes veciñais incidiron na necesidade non so de plans concretos entorno a obras recentes como a de San Pedro, Conxo ou a Carreira do Conde, senón dun plan de mobilidade para todo o conxunto da cidade. O Concello comprométese, pola súa banda, a reducir progresivamente os viais para o tráfico e a eliminar aparcadoiros en superficie, medidas apoiadas polos representantes veciñais e responsables municipais. Humanizar a cidade e o equilibrio inversor son as principais conclusións extraídas deste foro.


Máis información:

20 de noviembre de 2014

Xuntanza co Alcalde de Santiago, Agustín Hernández


Froito da petición conxunta formulada por Santiago Centro Área Comercial e a Asociación Veciñal Raigame, -en representación de comerciantes e veciños do Ensanche compostelán-, o dia 8 de outubro do 2014 no Rexistro Xeral do Concello de Santiago, fomos convocados o pasado dia 12 de novembro polo actual alcalde, Agustín Hernández, para tratar a suposta "peonalización" da Rúa Carreira do Conde e a urbanización da Rúa Montero Ríos.

O Sr. Hérnandez explicounos que a reforma da Carreira do Conde é un tema pechado. Está subvencionado pola Xunta de Galicia e sae a licitación segundo os planos que se achegan na seguinte ligazón: 


Como o rexedor compostelán non tiña moi claros os detalles máis miúdos (plan de tráfico alternativo, situación da gasolineira, prazas de aparcamento eliminadas, etc....) acordamos outra xuntanza cos Concelleiros de Urbanismo e de Tráfico para falar de todo o que esa obra supón, con fin de poder informar ós veciños e comerciantes da zona. 
   


8 de noviembre de 2014

Xornada de Portas Abertas no Museo da Fundación Sotelo Blanco



O vindeiro sábado día 22 de novembro, o Museo de Antropoloxía e Etnografía da Fundación Sotelo Blanco, sito en San Marcos Nº 77, abrirá as súas portas a todas aquelas persoas e grupos organizados que desexen coñecer o xeito de vivir dos nosos antergos e descubrir o auténtico tesouro que custodia esta fundación. A xornada, que será de balde, guiada e contará con obradoiros e diversas actividades complementarias, terá como obxectivo redescubrir os vellos oficios e os apeiros que se empregaban nas labouras do campo, así como tamén para moer, tecer, ou traballar a pedra, a madeira e o ferro. 

Dende a Fundación cren que é “unha ocasión única” para coñecer as pezas deste museo “que garda a memoria dunha cultura que mirada desde a segunda década do século XXI podemos considerar perdida”, pero que “forma parte dos sinais diferenciais” que marcan a identidade do pobo galego. Dende a fundación tamén agradecen a todas aquelas persoas ou organizacións interesadas en asistir a esta xornada de portas abertas que comuniquen a hora prevista de chegada e a súa intención de participar nalgún dos obradoiros ou actividades programadas co fin de concretar o número aproximado de visitantes e garantir unha mellor atención. Para elo será preciso chamar ó teléfono 981 582 571 ou enviar unha mensaxe ó seguinte enderezo electrónico: museoantropoloxia@fundacionsoteloblanco.org 

Dende a Fundación agradecen a divulgación deste evento e convídannos a todas e todos a achegarnos a San Marcos para botar unha ollada atrás e recrear parte da historia do noso país e a realidade ou o xeito de vivir dos nosos antepasados; as nosas propias raigames.



Máis información:




30 de octubre de 2014

Participación cidadá no medioambiente compostelán

O Centro de Interpretación Ambiental do Concello de Compostela (CIAC), sito no Parque de Belvís, está a enviar unha breve enquisa ás Asociacións de Veciñas e Veciños de Santiago de Compostela para realizar unha sondaxe sobre as inquedanzas da veciñanza encol do Medio Ambiente na cidade. O fin principal da mesma é obter unha serie de información útil co propósito de adaptar as actividades e contidos futuros do CIAC ás necesidades reais da cidadanía, amais de fomentar a implicación da mesma no centro. Dende a Asociación de Veciñas e Veciños Raigame queremos unírmonos a esta iniciativa e trasladar ós veciños a necesidade e a importancia de participaren nesta sondaxe. Podedes acceder á enquisa premendo na seguinte ligazón:


Dende o CIAC agradécese a difusión da citada enquisa, xa que segundo consideran, canta máis xente a cubra máis representativa será.



Máis información: 
Centro de Interpretación Ambiental de Compostela (CIAC)
Rúa Camiño da Ameixaga s/n (Mapa: http://goo.gl/SjJLt1)
Teléfono: 981 543 145
Sitio web do CIAC: http://goo.gl/VM2q47 
Facebook do CIAC: https://www.facebook.com/CIACBelvis 

29 de octubre de 2014

Xornadas formativas en eficiencia enerxética

A Fundación Santiago Centro está a promover unhas xornadas formativas en eficiencia enerxética, para tratar de apoiar o comercio e a pequena empresa, e que van dirixidas a todo tipo de empresarios, consumidores e veciños. A preocupación polo custo da enerxía e os prexuízos ambientais das emisións de efecto invernadoiro, serán algúns dos temas a tratar. As charlas son de balde e celebraranse os vindeiros días 6, 13 e 20 de novembro en horario de 21:00h a 22:30h no Restaurante Paz Nogueira de Santiago de Compostela. Expóñense a continuación os temas principais a tratar:

1ª Xornada (6 de novembro): ¿Como entende-la factura eléctrica?

2ª Xornada (13 de novembro): ¿Como escoller unha iluminación adecuada? 

3ª Xornada (20 de novembro): ¿Que debería saber sobre climatiación?

Para asistir ás xornadas será preciso inscribirse previamente, ben sexa chamando ó 981 59 01 06, ou ben a través dos seguintes enderezos electrónicos:

info@fsantiagocentro.es  
www.fsantiagocentro.es 








11 de octubre de 2014

Comercio e veciños do Ensanche piden unha entrevista co Alcalde



O pasado día 8 de outubro de 2014, Santiago Centro Área Comercial e a Asociación de Veciños Raigame, en representación dos comerciantes e veciños do Ensanche, presentaron no Rexistro Xeral do Concello de Santiago un escrito conxunto solicitando unha entrevista co actual rexedor compostelán, Agustín hernández, co obxectivo de trasladarlle a nosa sorpresa e preocupación sobre dos acordos adoptados polo goberno local relativos á "peonalización" da Rúa Carreira do Conde e a urbanización da Rúa Montero Ríos. 


Novas relacionadas:



2 de septiembre de 2014

Raigame reúnese co novo rexedor compostelán

O pasado 14 de xullo do presente ano 2014, a Asociación de Veciños Raigame presentou no Rexistro un escrito dándollela benvida ó novo Alcalde de Santiago, e, ó tempo, solicitando unha entrevista.

Agustín Hernández, acompañado do concelleiro de Relacións Veciñais e Medio Rural, José Rosende, recibiu, onte dia 1 de setembro, a membros da directiva da nosa Asociación, encabezados polo presidente Xaquín Mato.

Na reunión, cordial e atenta, deixóuselle ó novo rexedor copia dos últimos escritos dirixidos ó goberno municipal (problemas no subsolo da Avenida Rosalía Castro, contedores e recollida de lixo...) así como algunhas ideas e propostas sobre comercio, mobilidade, medio ambiente, sinalizacións, dinamización do barrio, etcétera. 

Dende Raigame valoramos positivamente a predisposición municipal para escoitar as nosas demandas, que seguiremos presentando e denunciando publicamente no caso de non ter solucións nun tempo razoable.

17 de junio de 2014

O CSC O Ensanche prepara o San Xoán

Imaxe: CSCXM O Ensanche

Hoxe día 17 de xuño de 2014, co gallo da celebración do San Xoán, o Centro Sociocultural e Xuvenil Municipal O Ensanche vén de acoller unha interesante charla sobre “Todo o que tes que saber do San Xoán”, a noite máis máxica do ano. Esta charla foi impartida por José Manuel Vázquez Varela, antropólogo e catedrático da USC, e nela analizáronse os porqués desta festa. Ademais desta charla, o CSCXM O Ensanche está a organizar uns roteiros para recoller, o vindeiro luns día 23, as plantas de San Xoán. Estes roteiros celebraranse ás 10.30h da mañá e ás 18.00h do serán. Para a quenda das 10:30h, a inscrición realizarase no CSC Ensanche. Para a quenda das 18:00h, a inscrición realizarase no CSC de Conxo.

Por se fose pouco, o vindeiro venres 20 de xuño ás 18:00h, no “venres en familia”, o CSCXM O Ensanche propón un SAFARI FOTOGRÁFICO pola Ruta do Sarela, co fin de que os máis pequenos da casa, acompañados de adultos, coñezan e identifiquen as diferentes plantas que vaian atopando por este fermoso parque compostelán. As inscricións poderanse realizar ata o vindeiro xoves 19 no CSC O Ensanche, na Rúa Frei Rosendo Salvado 14-16.


Máis información:

http://www.santiagosociocultural.org/

http://www.facebook.com/oensanche

http://oensanche.wordpress.com/

19 de mayo de 2014

II Campus de Cociña Infantil CompH!ostelería


Hoxe, día 19 de maio de 2014, ábrese o prazo de inscrición para o II Campus de Cociña Infantil CompH!ostelería, que logo do éxito acadado na súa primeira edición, a Asociación Hostelería Compostela volverá a organizar por segundo ano consecutivo. Os obxectivos deste obradoiro, que se celebrará entre o 23 de xuño e o 18 de xullo de 2014 en horario de 09:00h a 14:30h, serán os de achegar ós máis cativos a cultura gastronómica e “crear unha conciencia de alimentación sa e saudable afondando en todos aqueles elementos que teñen que ver coa alimentación”. Este II Campus de Cociña Infantil vai destinado a nenas e nenos de entre 6 e 12 anos de idade. O número de prazas é limitado, e o criterio de admisión será por rigorosa orde de inscrición. Para inscribirse será preciso presentar debidamente cuberto o Formulario de Inscrición nas oficinas do Centro de Formación e Cultura Gastronómica (Rúa das Salvadas, 29 baixo)

Máis información en:
Centro de Formación e Cultura Gastronómica
Rúa das Salvadas, 29 baixo. Vista Alegre
Tlf: 981 583366 – Fax: 981 582041
formacion@santiagohosteleria.org
www.santiagohosteleria.com


"Tras a pista das Gárgolas" da A.VV. As Marías




Este pasado domingo 18 de maio de 2014, a Asociación Veciñal As Marías vén de organizar unha interesante actividade familiar, lúdica e didáctica, baixo o nome de “Tras a pista das Gárgolas”. Este “xogo de pistas” deu comezo ás seis do serán na Praza de San Martiño Pinario. Participaron @s máis  grandes e pequen@s da casa, que gozaron de percorrer a cidade ollando as abondosas gárgolas compostelás “na procura dun tesouro”. 

14 de mayo de 2014

Manifesto “Un paso adiante e mais outro paso adiante, Galiza!” (17 de maio de 2014)

www.queremosgalego.org

Co gallo da celebración do Día das Letras Galegas, que este ano 2014 homenaxeará a figura do finado poeta guitiricense Xosé María Díaz Castro, dende a Asociación de Veciños Raigame queremos achegar unha ligazón ó Manifesto “Un paso adiante e mais outro paso adiante, Galiza!”, da autoría de Marica Campo, que será lido e resoará con forza nas mobilizacións que terán lugar en oito cidades galegas o vindeiro sábado 17 de maio a iso das 12 da mañá. Para ler o manifesto, preme na seguinte ligazón:


Aproveitamos tamén para informar dos emprazamentos onde terán lugar as mobilizacións promovidas pola Plataforma Queremos Galego!:

  • A Coruña: A carón do Teatro Rosalia de Castro (confluencia das rúas Real e Rego de Auga)
  • Ferrol: Praza de Armas
  • Foz: Praza do Conde de Fontao
  • Lugo: Xardíns de San Roque (diante da estatua de Xoán Montes)
  • Ourense: Alameda – Xardíns Bispo Cesáreo (diante da estatua de Eduardo Blanco Amor)
  • Pontevedra: Praza da Peregrina
  • Santiago de Compostela: Porta Faxeira
  • Vigo: Manifestación con saída de Vía Norte


Deixámosvos cun duro pero fermoso poema de Xosé María Díaz Castro e desexámosvos que gocedes deste 17 de maio, deste noso Día das Letras Galegas 2014:

     “Un paso adiante i outro atrás, Galiza,
                                                       i a tea dos teus sonos non se move.
                                                       A espranza nos teus ollos se esperguiza.
                                                       Aran os bois e chove.

                                                       Un bruar de navíos moi lonxanos
                                                       che estrolla o sono mol como unha uva;
                                                       pro tí envólveste en sabas de mil anos
                                                       i en sonos volves a escoitar a chuva.

                                                       Traguerán os camiños algún día
                                                       a xente que levaron: Deus é o mesmo.
                                                       Suco vai, suco vén, Xesús-María!,
                                                       e toda cousa ha de pagar seu desmo.

                                                       Desorballando os prados coma sono
                                                       o tempo vai de Parga a Pastoriza.
                                                       Vaise enterrando, suco a suco, o Outono.
                                                       Un paso adiante i outro atrás, Galiza!”
                                                       Xosé María Díaz Castro, Nimbos



5 de mayo de 2014

O CSC O Ensanche inaugura “Compostela Única”



Mañá día 6 de maio, a partires das 20:00 horas, terá lugar no Centro Sociocultural O Ensanche, -na rúa Frei Rosendo Salvado, 14-16-, o acto de inauguración da Exposición “Compostela Única”. Esta mostra, promovida polo Ateneo de Santiago, pretende achegarnos á historia da cidade a través de antigas fotografías, todas elas realizadas antes do ano 1965 e cedidas por diversas persoas e colectivos, entre eles, a Asociación de Veciños Raigame. A exposición componse dunhas 200 imaxes organizadas en oito temas principais:

  • Compostela pedra a pedra
  • Universidade, ensino e cultura
  • A Igrexa e o Camiño de Santiago
  • Oficios, obradoiros e actividade comercial
  • Fotografías de Autor 
  • A sociedade compostelá
  • Deportes
  • Festas e romerías.

O acto de inauguración correrá a cargo de Antón Porteiro, membro da Xunta Directiva do Ateneo de Santiago e de José Manuel Ortigueira, Comisario da exposición. A mostra estará aberta até o vindeiro venres 16 de maio do presente ano 2014.

Para a Asociación de Veciños Raigame é unha honra colaborar co Ateneo e co Concello de Santiago na difusión do patrimonio cultural compostelán.


Máis información:

8 de abril de 2014

A Fundación USC Deportiva convoca o III Curso de Fotografía da Natureza


A Fundación USC Deportiva acaba de convocar o seu III Curso de Fotografía de Natureza, que terá lugar os días 9, 11 e 16 de maio do presente ano 2014 na Facultade de Formación do Profesorado, na Avenida de Ramón Ferreiro de Lugo. O curso, dunhas 14 horas, será impartido polo fotógrafo e profesor Andrés Fraga. Neste obradoiro trataranse, principalmente, temas como a paisaxe, a caza fotográfica de fauna e fotografía de vexetación.

A Fundación procurará mediante este curso fotográfico "que o alumno, afeccionado a saír ao monte coa súa cámara, coñeza as pautas básicas da fotografía de natureza, dende a fotografía de paisaxe á de plantas e animais". Ademais, este curso tratará de achegar ós seus alumnos as "técnicas máis utilizadas polos fotógrafos de natureza, das cales algunhas se poderán aplicar na próxima saída que fagan ao monte e outras, as máis complicadas de aplicar por cuestión de equipo ou dificultade, que se ben non se utilizarán nun primeiro momento, serviranlle para entender como se fan as imaxes que se ven a diario en revistas ou Internet". O curso ten un custo de 100 € e un cupo de 15 prazas que serán cubertas por rigorosa orde de inscrición. 

Lembrade:

  • Lugar: Facultade de Formación do Profesorado (Avda. de Ramón Ferreiro, s/n) Concello de Lugo
  • Datas: Venres 9 de maio (18:00 a 21:00 h), Domingo 11 de maio (10:00 a 18:00 h) e Venres 16 de maio (18:00 a 21:00 h)
  • Prezo: 100 €
  • Prazas: 15
Para facer a túa inscrición preme na seguinte ligazón: [Inscrición]


31 de marzo de 2014

As Marías estrean programa de radio

Imaxe: avvasmarias.org

A Asociación Veciñal As Marías vén de estrear, o pasado 27 de marzo en A Kalimera Rádio Livre, "RadioMarías", un programa de radio que nace para contarnos "as novidades do barrio e compartir os saberes da súa xente". O programa emitirase tódolos últimos xoves de cada mes a iso das 20:30 horas no 107.9 FM. Tamén podes seguilos na internet a través da súa comunidade de seguidores na rede social Facebook, onde teñen previsto pendurar ligazóns de audio dos seus programas: As Marías Asociación Veciñal. Dende a Asociación de Veciños Raigame desexámoslles moita sorte nesta nova andaina nas ondas!

Lembrade: Último Xoves de cada mes, ás 20:30h no 107.9 FM


Máis información:




Raigame solidarízase coas reivindicacións de Galeras

Foto: CC BY-SA Praza Pública

A comezos do pasado mes febreiro, veciños do barrio compostelán de Galeras abrían na rede social Facebook o grupo "Querémoslle ao Parque de Galeras", que responde a unha "Iniciativa de asociacións veciñais afectadas pola usurpación do espacio público do Parque de Galeras para construcción de un acceso a aparcamento privado"

Dende a Asociación de Veciños Raigame queremos solidarizarnos cos veciños afectados de Galeras e mostrar o noso apoio ás reivindicacións e movilizacións que se opoñen á privatización do parque e á consecuente perda dunha importante zona verde da cidade e dun ben público e común. 

Máis información: 

27 de marzo de 2014

Manifesto por unha sanidade pública

Copia do rexistro de entrada do escrito na Consellería de Sanidade
 da Xunta de Galicia

A continuación achégase copia do Manifesto por unha sanidade pública, asinado pola meirande parte das asociacións veciñais urbanas de Santiago de Compostela e remitido á Consellería de Sanidade e ó Concello de Santiago o pasado 28 de febreiro do presente ano 2014:


Manifesto por unha sanidade pública

      "As asociacións veciñais somos e representamos á veciñanza compostelá, ás persoas que na cidade de Santiago pagan cos seus impostostos os servizos públicos sanitarios e tamén a aquelas xentes que traballan neles. 

      Por este motivo, estamos preocupados polas noticias que, cada día, amosan a degradación dun dos nosos dereitos fundamentais - o da saúde-, ou amenazan con re-pagos que converterán o que hoxe é de todos, nunha cousa reservada a aqueles que poidan pagalo.

      Os servizos sanitarios, como outras prestacións desenvolvidas polo estado do benestar, son froito do esforzo común; son un logro colectivo do que podemos presumir con orgullo, porque son universais, e porque son dunha calidade innegable. 
Pero nestes días vemos, con estupefacción, como os enfermos máis desfavorecidos non teñen acceso aos tratamentos; como a unha parte da poboación inmigrante se lle retira este dereito fundamental; como doentes de familias son desviados a hospitais arredados da súa casa. 
Ese non é o noso modelo. O dereito á saúde é inherente ás persoas, así é e así debe seguir sendo. Un servizo para todos e todas, próximo, universal e gratuíto.

      Vemos tamén como se reorganizan servizos e áreas sanitarias -como a de Santiago- sen pensar nas necesidades reais da poboación e ás recomendacións dos profesionais; como se "externaliza" o que é noso, baixo o principio de que o público non funciona cando é certo que a alta calidade do noso sistema de saúde débese, precisamente, a que é público e non se xestiona con criterios de beneficio económico.

      É por todo isto, que non comprendemos porqué teimamos en voltar atrás... e desmantelar o construído con tanto esforzo; porqué se xeran "recursos ociosos" que xustifiquen modificacións nas áreas sanitarias cando hai listas de agarda para acceder aos servizos; porqué se mina a confianza e bo facer dos traballadores e traballadoras da saúde que desenvolven a súa labor sen os medios materiais e humanos necesarios; porque se consente que haxa persoas excluídas do acceso á saúde pola súa orixe ou situación económica... Son tantas cousas as que non se entenden. A crise económica só é unha escusa, poderosa e demagóxica, a esta desfeita.

      É por todo isto que facemos un chamamento, alto e claro á Xunta de Galicia e ao goberno central, para que poñan fin a esta demolición e para que respecten os principios de igualdade, calidade e gratuidade que deben rexer a xestión dos servizos sanitarios. E ao Concello de Santiago para que impida que as decisións que afectan á nosa área sanitaria -como a reasignación ó CHUS, de pacientes da provincia de Pontevedra- afecten a calidade dos servizos ofrecidos aos seus veciños e veciñas.
Queremos o que temos -aínda que cada vez menos-: un servizo de saúde público, universal, gratuíto e de calidade".

En Santiago de Compostela, a 28 de Febreiro de 2014

Asinado polas Asociacións de Veciños de Santiago, que se detallan:

A.Vv. Alexandre Bóveda
A.Vv. A Xuntanza
A.Vv. As Brañas de Andrés
A.Vv. As Cancelas
A.Vv. As Marías
A.Vv. Doutor Maceira
A.Vv. Francisco Asorei
A.Vv. Monte de Dios
A.Vv. Monte do Gozo
A.Vv. O Castiñeiro
A.Vv. Polígono de Vite
A.Vv. Raigame
A.Vv. Sar
A.Vv. Río Sarela - San Lourenzo
A.Vv. Sandra Prego Rial

Copia do rexistro de entrada do escrito no Concello de Santiago


26 de marzo de 2014

Aberto o prazo de pagamento das cotas de asociados 2014

Prezado socio :

Mediante a presente, informamos que abrimos o prazo de pagamento das cotas de asociado co seguinte calendario:

Importe anual: 10 euros

Días de cobro

  • Martes 18 e Martes 25, neste mes de Marzo
  • Xoves 3,  Xoves 10  e  Xoves 24 do mes de Abril

Horario

  • De 19,30  a 21,00 h.

Lugar: Centro Socio Cultural O Ensanche - Frei Rosendo Salvado, 14


Agradecido pola súa fidelidade, saúdos veciñais en Santiago a 14 de marzo de  2014


Asdo.

Xaquín Mato
Presidente da AA.VV. Raigame