15 de diciembre de 2015

Chega o Nadal a Compostela!


 
Arranca o Nadal 2015 en Compostela cun total de 218 actividades, para grandes e pequenos, que se espallarán polos distintos barrios e parroquias da cidade durante estas datas. O Concello de Santiago vén de publicar na internet a web "Nadal en Compostela", un almanaque dixital a través do cal os veciños poden consultar, en función da idade, da parroquia e da actividade, os diferentes eventos que terán lugar e as horas previstas dos mesmos.

Os vindeiros días 20 e 27 de decembro a partires das 18:30h, a Praza Roxa acollerá as Regueifas con chocolate, un xeito doce e apetecible de coñecer unha manifestación da cultura popular a piques de desaparecer, na que dous contrincantes batallan nunha competición oral improvisada e, por suposto, cantada.

Dende a Asociación Veciñal Raigame desexámoslles unhas boas festas de Nadal!

4 de noviembre de 2015

Magosto 2015 na Praza Roxa compostelá

 
 
Este sábado día 7 de novembro do 2015, as castañas volverán a ser as verdadeiras protagonistas na Praza Roxa compostelá, que acollerá un dos festexos máis tradicionais do noso país; o magosto. Os xogos populares, a iso das 17:00h, darán o pistoletazo de saída a este festexo cidadán e familiar aberto a grandes e pequenos. Non faltarán os contacontos nin os xogos de rúa. A partires das 19:00h haberá foliada a cargo do grupo compostelán "Do Fondo do Peto", que amenizará o reparto e degustación das castañas.
 
A organización deste outonal festexo correrá a cargo d@s veciñ@s do Ensanche, representad@s pola Asociación de Veciñ@s Raigame, e contará coa colaboración do Concello de Santiago, da Rede de Espazos Socioculturais de Santiago, da Deputación da Coruña e da Afundación de Abanca. Así que xa sabedes, se esta fin de semana aínda non fixéchedes plans, estades tod@s convidad@s a achegarvos até a Praza Roxa e gozar deste magosto picheleiro, vecinal e familiar.  

13 de septiembre de 2015

Todo listo para a Festa dos 55 anos do Ensanche!


Imaxe: La Voz de Galicia

 
Tal e como viñemos informando, un activo grupo de comerciantes, veciños i entidades sociais de Compostela están a artellar unha feira do comercio e unha gran festa de conmemoración dos 55 anos do Ensanche, que terá lugar o vindeiro sábado día 26 de setembro na contorna das Casas de Ramírez. A data deste evento coincide co día no que se outorgaron os títulos de propiedade das Casas de Ramírez no ano 1960.

A xornada contará cunha feira do comercio na que medio centenar de empresarios exporá os seus produtos nas rúas de Ramón Cabanillas, San Pedro de Mezonzo, Diego de Muros e Rodríguez Carracido. Na festa tampouco faltarán actividades lúdicas e festivas encamiñadas, segundo os seus organizadores, a recuperar a memoria da zona i estimular o espírito de barrio. Haberá obradoiros de manualidades e maquillaxe, contacontos, pasarrúas a cargo do grupo "La Magnifique" e actuacións musicais da man de "Pablo Sanmamed", "Isaías Salazar Trío", "Coro da Rá" e "Vai Trío". Tamén haberá un xantar popular con polbeira na Praza Roxa.

Durante a xornada, os organizadores desta festa tamén porán á venda postais con imaxes antigas do Ensanche, cedidas polo fotógrafo santiagués José Guitián, para contribuír a financiar o evento. Xa sabedes, o vindeiro 26 de setembro, tod@s ó Ensanche a celebrar o 55 aniversario deste céntrico e importante barrio compostelán!
 
Máis información:
 

18 de julio de 2015

Festa de celebración dos 55 anos do Ensanche

Imaxe: "Festa 55 anos no Ensanche compostelan"

Un activo grupo de veciños e membros da Asociación Veciñal Reigame están a organizar unha gran festa para conmemorar os 55 anos da construción das Casas de Ramírez en Santiago de Compostela. Esta festa terá lugar o sábado día 26 de setembro do presente 2015 nas rúas do Ensanche. 

Podedes seguir o traballo destes veciños a través da páxina de Facebook “Festa 55 anos no Ensanche compostelán”. Nesta páxina, ademais, anímase a tódolos veciños a compartir fotografías antigas, e tamén recentes, deste céntrico barrio de Compostela. Seguiremos informando de tódalas novidades que vaian xurdindo sobre desta interesante iniciativa veciñal.


Máis información:


21 de junio de 2015

O "Espazo Cidadán" das Festas de San Pedro

A Asociación Veciñal A Xuntanza, coa colaboración da Comisión de Festas do Barrio de San Pedro, está a organizar o Espazo Cidadán, un foro que terá lugar o vindeiro sábado 27 de xuño e que pretende ser un espazo aberto á conversa entre a cidadanía a través de mesas redondas, micros abertos, etc. Este Espazo Cidadán estará instalado na Praza 8 de Marzo, dende as 12 da mañá até as 20:30h do serán. 

A apertura desta xornada de participación cidadá correrá a cargo do noso prezado Secretario, Agustín Pena, - todo un referente do movemento veciñal -, Rosa Muñíz (Cidadanía) e o Alcalde de Santiago de Compostela, Martiño Noriega, co “Artellando en común”. Os tres, en representación das asociacións veciñais, da cidadanía e do Concello, tratarán de pór voz ós problemas reais da cidade nunha conversa pública, así como artellar solucións en común.  Esta primeira mesa redonda terá lugar, como diciamos, na Praza 8 de Marzo, de 12 a 13:30h. 

Ó longo do día haberá outras dúas mesas redondas. A segunda, de 17 a 18:30h, terá como tema principal “Que fai unha moza coma tí nun lugar coma este? Mulleres no heteropatriarcado”. A terceira, de 19 a 20:30h; “Rar@s somos tod@s. Vidas Independentes”. Xa sabedes, o vindeiro día 27 estamos tod@s convidad@s a conversar, a debater, a que se nos escoite, a artellar en común o xeito de facer desta nosa cidade un lugar mellor para tod@s.

27 de abril de 2015

A primavera detense no Ensanche!


A Fundación Santiago Centro Área Comercial está a preparar unha gran festa do comercio baixo o título “A primavera o Ensanche altera”, coa finalidade de atraer clientes ós comercios da contorna do Ensanche e incrementar as súas vendas.  Esta actividade terá unha duración de case un mes para os asociados a Santiago Centro Área Comercial; concretamente, do día 20 de abril até o 16 de maio do presente ano 2015. 

Durante todo este tempo, os clientes poderán atopar nos comercios da zona unhas tarxetas de fidelidade. Estes cartóns teñen unhas casiñas para conseguir selos. Se o cliente merca algo por valor superior a 20€ (10 € en hostelería), unha vez lle selen e lle grampen o resgardo de compra e unha vez completo, terá dereito a un regalo directo. A entrega destes premios realizarase na xornada da "Festa do Comercio", o día 16 de maio, nun espazo habilitado a tal efecto e situado na Praza Roxa.

Na última xornada, é dicir, o sábado 16 de maio, culminarase esta campaña cunha gran “Festa do Comercio no Ensanche”, na que participarán tamén os comercios non asociados. Como a data desta feira coincide coas festas da Ascensión, dende a Fundación encargaranse de organizar actividades festivas durante todo o día, obradoiros de zumba, taichí, así como exhibicións de baile, pasarrúas, comparsas e charangas. 

Podedes informarvos de toda a programación prevista, as datas e os establecementos adheridos, na seguinte ligazón:



16 de abril de 2015

Raxoi informa das melloras nas obras da Carreira do Conde

Imaxe: www.santiagodecompostela.org

Onte, día 15 de abril de 2015, o alcalde do Concello de Santiago, Agustín Hernández, reuniuse de novo cos representantes de comerciantes e veciños da contorna do Ensanche para atender algunhas das demandas que lle achegamos, a través das asociacións Santiago Centro Área Comercial e Raigame, logo dos acordos adoptados en relación ás obras proxectadas para a “humanización” da rúa Carreira do Conde. 

Logo de dúas xuntanzas entre Santiago Centro Área Comercial, Raigame e o Alcalde, celebradas no Pazo de Raxoi os días 12 de novembro de 2014 e o 21 de xaneiro do presente 2015, nas que amosamos a nosa inquedanza ante as obras proxectadas e achegamos diferentes propostas que procuraban eliminar prazas de aparcamento sen prexudicar ós veciños e ós comerciantes, o rexedor comprometeuse a analizar as propostas presentadas e a procurar unha solución alternativa ó proxecto inicial sen renunciar a “humanizar” e suprimir o tráfico destas rúas. 

Nesta terceira e última reunión celebrada onte, Hernández, acompañado pola Concelleira de Urbanismo Teresa Gutiérrez, explicoulles a José María Fernández e Delmiro Prieto, de Santiago Centro Área Comercial, e a Xaquín Mato e Luís Prados, de Raigame, as melloras que se incorporarán ás obras da Carreira do Conde. 

Agustín Hernández comunicoulles que a rúa será parcialmente peonalizada, deixando o paso do tráfico e unha ringleira de estacionamentos a carón dun muro. Iso si,  sen renunciar nun futuro á súa completa peonalización cando se solventen os problemas de aparcamento do Ensanche. Hernández explicou tamén que negociará coas concesionarias dos aparcadoiros públicos para mellorar o sistema de pago e incorporar bonificacións que favorezan o comercio local e que estaban estudando a construción dun aparcadoiro na Avenida da Coruña.

Por outra banda, o Alcalde comprometeuse a incentivar o comercio local a través dunha campaña á que destinará un total de 100.000 euros, e insistiu nos beneficios ambientais e de calidade de vida para os cidadáns que traerán consigo as obras de humanización que xa se están a levar a cabo na Carreira do Conde.



Novas relacionadas:

20 de febrero de 2015

Feira en Ramón Cabanillas



Mañá sábado, día 21 de febreiro, celebrarase unha feira na Rúa Ramón Cabanillas que contará con diferentes actuacións (contacontos, dúo musical e demostracións de educación canina) e descontos especiais nos comercios da zona. Haberá tamén postos de polbo á feira e filloas, polo que non podes faltar!

15 de febrero de 2015

Planta unha árbore no Bosque de Galicia


Onte día 14 de febreiro de 2015 deu comezo a interesante iniciativa “Planta unha árbore no Bosque de Galicia”, promovida pola Fundación Cidade da Cultura de Galicia en colaboración coa Fundación USC Deportiva, que nace para facer un chamamento á cidadanía e pedir a súa colaboración na fase de implantación do proxecto do Bosque de Galicia, apoiado pola Escola Galega da Paisaxe da Fundación Juana de Vega

O propósito desta actividade, que deu comezo onte e que se celebrará durante os vindeiros días 21 e 28 de febreiro;  7, 14, 21 e 28 de marzo e 11, 18, 25 de abril, é o de dar a coñecer á sociedade galega este novo pulmón verde da cidade, explicar as accións que se están a desenvolver, e rematar a xornada plantando unha árbore. Toda a información referente a esta actividade (datas de realización, horarios, contido e inscricións) pode ser consultada no apartado de Actividades da páxina web da Fundación USC Deportiva ou premendo na seguinte ligazón:



23 de enero de 2015

Raxoi reconsiderará o proxecto da Carreira do Conde

Imaxe: R.M. Santiago, La Voz de Galicia


Parece que volve a normalidade ás rúas de Montero Ríos e a Carreira do Conde, ou iso é o que semella desprenderse das boas novas publicadas onte en distintos medios de comunicación logo da última reunión que mantivemos este pasado día 21 os comerciantes e veciños do Ensanche, representados pola Fundación Santiago Centro Área Comercial e a Asociación de Veciños Raigame, co actual rexedor compostelán Agustín Hernández. Froito do diálogo mantido nesta última xuntanza, o Alcalde comprometeuse a analizar as propostas presentadas e a procurar unha solución alternativa ó proxecto inicial sen renunciar a “humanizar” e suprimir o tráfico destas rúas. 

Achegamos de seguido unha serie de ligazóns a diferentes medios de comunicación locais que se fixeron eco das conclusións extraídas desta xuntanza:

21 de enero de 2015

Comezan as obras de peonalización do Ensanche compostelán

Logo de que boa parte dos comerciantes e veciños da Zona Nova de Compostela, -representados pola Fundación Santiago Centro Área Comercial e pola Asociación de Veciños Raigame-, nos reunísemos en máis dunha ocasión co actual rexedor do Concello de Santiago para comunicarlle a nosa oposición á realización dunhas obras que pretenden reducir os carrís de circulación, ampliar beirarrúas i eliminar todas as prazas de aparcamento en Montero Ríos e na Carreira do Conde, e de comprobar que as mesmas xa deron comezo, queremos expoñer unha serie de alegacións que presentamos hoxe día 21 de xaneiro de 2015 ante a Alcaldía do Concello de Santiago de Compostela:

Para eliminar as prazas de aparcamento en superficie, é dicir, para obrigar ó cidadán a que restrinxa o uso do coche privado, sen prexudicar ós residentes e ó pequeno e mediano comercio da zona ESIXIMOS,

1. Que se habilite unha ampla zona de aparcadoiros no Ensanche que favoreza o poder deixar o coche incluso nos días más chuviosos. Propoñemos a explanada do Colexio Peleteiro á que actualmente non se lle está dando ningún uso. Reivindicamos de igual modo, que se habilite outra ampla zona de aparcamento, pola entrada de Conxo onde hai bastante terreo para elo e onde os coches podan deixar sen custo ou como se facía no aparcamento de Cornes que nunca deberían habelo quitado.

2. Solicitamos un dialogo constante co Concello, para que nos manteñan informados dos cambios que pretendan realizar na nosa zona de influencia. Queremos ter todas as reunións que sexan necesarias para poder chegar a adoptar acordos que permitan un prezo máis razoable dos aparcadoiros da zona, agora mesmo son excesivos para a meirande parte da xente traballadora. Do mesmo xeito, prantexamos a necesidade de chegar a un acordo para que presentando o ticket de compra nos parkings, os clientes, obteñan un desconto significativo na hora de aparcamento ou unha hora de balde.

3. Consideramos moi necesario para fomentar que se empreguen menos os vehículos, aumentar as liñas do transporte público que garantan unha boa comunicación con servizos públicos, privados, de barrios e de poboacións próximas e máis afastadas. Isto é imprescindible para que o coche se utilice menos. Aumentar os horarios dos autobuses urbanos e interurbanos,  até as 23:30 da noite, hora que permite acudir a actividades despois da xornada laboral e prescindir así do coche. Agora mesmo é un horario moi reducido.

4. O regreso do NOITEBUS durante as fins de semana, tamén evitaría o uso do coche e outros males maiores. 

5. Adecuar os horarios de carga e descarga ó dos comercios.

Para impedir que se realicen estas obras, que xa deron comezo e que suprimen prazas de aparcamento sen ofrecer solucións ó problema que temos na cidade, dende a Fundación Santiago Centro Área Comercial e a Asociación de Veciños Raigame, estamos a recadar firmas de apoio da cidadanía a través da internet, no portelo web de Change.org ("STOP a las obras que eliminan plazas de aparcamiento sin ofrecer soluciones al problema que tenemos en Santiago de Compostela"), e tamén de xeito físico nos comercios da zona. Animámosvos a todos a asinar. 

13 de enero de 2015

Homenaxe a Vivencio Freire Dapena

Diversas persoas e colectivos do barrio compostelán do Castiñeiriño, co apoio incondicional da Asociación de Veciños Raigame do Ensanche, estamos a preparar unha homenaxe a  Vivencio Freire Dapena, - eximio veciño -, como recoñecemento e amizade polos moitos anos de servizo a Compostela. O acto, aberto a toda a cidadanía, terá lugar o vindeiro sábado día 17 de xaneiro a partires das 12:00h da mañá no Centro S.C. "Agustín Bueno" do Castiñeiriño

Neste acto de recoñecemento, trataremos de transmitirlle en persoa o noso agarimo, afecto e admiración por toda a ilusión, esforzo e tempo, investidos na nosa cidade e para beneficio de tódolos composteláns. Logo do acto, tódolos asistentes poderán gozar dun bo xantar no Restaurante "Paz Nogueira", para acompañar e arroupar ó noso modélico veciño. Na sobremesa farémoslle entrega dun agasallo. 

Para asistir ó xantar, será preciso contactar con Raigame antes do xoves día 15; data na que pecharemos as reservas. Dende a Asociación de Veciños Reigame queremos contar coa vosa presenza nesta cita tan importante para nós e para boa parte da cidadanía compostelá. Estades tod@s convidad@s!

Queremos aproveitar esta boa nova para compartir con vos unhas verbas que lle adicamos a Vivencio no marzal do ano 2006, con motivo daquela primeira homenaxe que o Concello de Santiago tivo a ben facerlle ó noso prezado veciño:





VIVENCIO



"Vivencio  Freire Dapena  naceu en Soutelo, Forcarei. Moi  novo marchou a Lugo. Nos anos 50 emigrou a Caracas. Alí empezou de pinche en Luz Eléctrica de Venezuela, a empresa de electricidade máis importante do país. O igual que tantos galegos loitadores, foi pasando por todos os  postos, ata chegar a ser supervisor encargado de zona.

En  1975 voltou a Galicia,con Sara, a súa dona - galega de Sarria-, e dous fillos: Tino e Mari Luz. Instaláronse no Castiñeiriño. E cando no 1977 naceu a Asociación de Veciños O Castiñeiro, el xa botou unha man. Na cidade, en 1980, puxeron un pequeno comercio no que hoxe é a rúa Nova de Abaixo e que- nos oitenta - ía camiño de ser un barrio marxinal. Ata que en 1987, Vivencio e outros poucos residentes na chamada “Calle Nueva”, fundaron  a Asociación Veciñal do mesmo nome  - que en poucos meses pasou a ser, xa, Raigame - , e puideron deter esa marcha cara á degradación social.

Rematando os noventa, Vivencio xubilouse oficialmente. Pechou o seu negocio, e dixo que se ía adicar a familia: a súa dona, os dous fillos, os catro netos... E non foi certo. O barrio do Castiñeiriño, a Asociación Veciñal, sábeno ben.

En Raigame nomeámolo SOCIO DE HONRA -co nº 1- e gabámonos de contar coa súa amizade, axuda e consello. E no Castiñeiriño, onde vive, segue loitando polo que unha persoa, nobre e comprometida como el, pelexou toda a vida: o ben común, a xustiza, a mellora de vida dos que nos rodean. Sen agardar nada a cambio (ou, as veces, algunha mala cara e verbas que feren…). Non está xubilado do colectivo veciñal. Está traballando arreo na directiva do Castiñeiro.
Xa sabedes... queda tanto por facer, ¡aínda! Así que, moitas grazas Sara, Tino, Mari Luz, por compartir con  nós, cidadáns composteláns, a esta boa persoa, exemplo e guía  para o colectivo veciñal: Vivencio Freire Dapena"